Kawih Kaulinan Barudak Sunda Jaman Baheula

Assalau’alaikum Warrohmatuloh Wabarokatuh

Piraku teuing urang Sunda henteu reueus kana kasundaana, komo deui wani mopohokeun kana seni budayana anu sakitu loba jeung luhur ajéna.

Kiwari loba pisan anu matak ngaruksak kana kaluhungan, kaahéngan jeung luhurna ajén budaya sunda boh ti lingkungan pergaulan ogé pangaruh media informasi.

Komo deui lamun urang sunda ngahaja ngaleungitkeun jati diri kasundaana boh tina basa alatan éra makéna, tina kasenian atawa tingkah polahna. Saperti soméah daréhdéh hadé kasémah, dépé-dépé handap asor atawa lungguh timpuh budi luhur jsb.

Titénan ogé ieu:

- Paguron penca silat keur nu resep menca

- Naha Urang Bet disebut Sélér Sunda?

Ku hal ieu simkuring anu asli pituin turunan urang sunda, geus jadi hiji kawajiban lamun ngabogaan cita-cita hayang ngamumulé seni budaya sunda sanajan luyu jeung kamampuhan.

Umajak ka sakabéh dulur ti kidul baraya ti wétan najan paanggang jeung nu dimana waé ayana. Hayu urang babarengan nanjeurkeun seni budaya urang sorangan, luyu jeung kamampuhna séwang-séwangan.

Anu resep dina kaseniana sok atuh tingkatkeun pangabisana, anu resep olah raga gancang geura ulik penca silatna jsb. Jeung leuwih penting deuih ulah éra nulis jeung cumarita ku basa sunda dimana waé tempatna, bari susuganan sakabéhna aya pangrojong ti pamaréntahana.

Sok sanajan simkuring gé wawanian jeung kumawani tapi lain wanian nulis ku basa sunda. Nya deuk iraha jeung dimana deui nulis sakieu panjangna ari lain dina blog boga sorangan mah.

Keun salah mah da ngarana gé diajar, bari susuganan aya inohong seni budaya sunda atawa seniman ahli sastra jeung basa. Anu daék nyarungsum ngarah jadi élmu, komo deui bari golosor jeung susuguhna.

Tah di handap aya kakawihan kaulinan urang sunda jaman baheula. Nu matak ngahudang rasa, matak rus-ras wararaas lamun inget harita keur leutik. Lulumpatan di tengahan sawah, ucing sumput, ngurek atawa méngbal di balong bangkar jsb.

Kawih Kaulinan Barudak Sunda Jaman Baheula :

Sigana loba kénéh kakawihana, ngan ieu mah anu apalna wungkul bari kaalaman ku simkuring. Mangsa harita keur bolon di kampung Blok Paréman baheulana Désa Cibaduyut Kacamatan Dayeuhkolot. Ayeuna mah jadi Kalurahan Mekar Wangi Kacamatan Bojong Loa Kidul Bandung.

Hanjakal ayeuna mah kampungna gé geus kakuriling ku komplék perumahan istana mekar wangi. Nu sésa kari waasna. Tamada nyanggakeun du'a ka Ibu Rama mugia husnul khotimah, dipaparinan rohmat kubur ku Alloh SWT. Amin ya rabbal 'alamin.

Salam baktos kasadaya wargi simkuring nu aya di kampung Blok Paréman ogé sadayana turunan urang sunda dimana baé ayana

Ampun paralun anu kasuhun, neda disihapunten tina sanés kanten hilap sinareng lepatna, Cag..

Wassalamu'alaikum Warrohmatuloh Wabarokatuh.